Kryeministri i Shqipërisë, Edi Rama, ishte sot në qytetin bregdetar të Himarës, ku mori pjesë në ceremoninë zyrtare të hapjes së sezonit turistik 2025. Gjatë fjalës së tij përshëndetëse, kreu i qeverisë u shpreh i bindur se ky sezon do të jetë një nga më të suksesshmit për Himarën, falë transformimit që ka pësuar qyteti dhe numrit të lartë të vizitorëve që tashmë janë të pranishëm nga e gjithë bota.
“Himara ka përjetuar një transformim rrënjësor. Atmosfera është pozitive, ka rënë qetësia dhe ndihet energjia për zhvillim. Jam i bindur që sezoni turistik do të jetë fantastik,” u shpreh Rama.
Ai shtoi se projektet për zhvillimin e infrastrukturës dhe përmirësimin e shërbimeve në bashkinë e Himarës do të vazhdojnë me ritme të larta, falë bashkëpunimit të ngushtë mes qeverisë dhe autoriteteve vendore.
“Himara është shembulli më i mirë se si vullneti i përbashkët dhe puna e palodhur japin fryte të prekshme. Ne nuk do ndalemi, sepse përparimi i kësaj zone është i pashmangshëm,” tha ndër të tjera kryeministri.