Artistja e njohur Tayna ka reaguar publikisht lidhur me protestat që po zhvillohen në Shqipëri, duke shprehur mbështetjen e saj për studentët dhe duke u përcjellë mesazhe të qarta institucioneve shtetërore. Përmes një postimi të gjatë në Instagram, këngëtarja ka bërë të ditur se po i ndjek prej ditësh zhvillimet në vend dhe ka vendosur të shprehë hapur qëndrimin e saj për situatën.
Në deklaratën e saj, Tayna ka theksuar se çdo person që mban një post drejtues duhet të jetë në shërbim të qytetarëve dhe jo të qëndrojë mbi ta. Sipas artistes, e drejta për të kundërshtuar pushtetin dhe për të kërkuar ndryshime duhet të respektohet. Ajo i është drejtuar gjithashtu Policisë së Shtetit, duke kërkuar që të ruhet qetësia dhe të shmanget përdorimi i dhunës gjatë protestave. Tayna ka nënvizuar se detyra e policisë është të mbrojë qytetarët, ndërsa ka bërë thirrje që asnjëra palë të mos përdorë dhunën apo të përfitojë nga situata për interesa të tjera.
Një vend të veçantë në reagimin e saj zënë studentët, për të cilët këngëtarja ka shprehur mirënjohje, duke kujtuar mbështetjen që të rinjtë shqiptarë i kanë dhënë gjatë karrierës së saj muzikore. Tayna u ka bërë thirrje studentëve të qëndrojnë të bashkuar rreth kërkesave të tyre dhe të mos lejojnë që kauza e tyre të shfrytëzohet për qëllime që nuk i përfaqësojnë.
Në fund të mesazhit, artistja ka theksuar rëndësinë e dialogut mes drejtuesve të shtetit dhe qytetarëve, duke e konsideruar dëgjimin e palëve dhe gjetjen e zgjidhjeve të përbashkëta si një hap të domosdoshëm për kapërcimin e situatës. “Shqipëria nuk është e një partie, e një qeverie apo e një individi. Shqipëria është e njerëzve të saj”, është mesazhi me të cilin Tayna ka përmbledhur qëndrimin e saj.