Besiktas po shton përpjekjet për të transferuar sulmuesin anësor të Manchester United, Jadon Sancho, i cili është rikthyer në “Old Trafford” pas huazimit te Chelsea sezonin e kaluar. Presidenti i klubit turk ka deklaruar se do të bëjnë maksimumin për ta sjellë në Stamboll, por gjithçka do të varet nga dëshira e vetë lojtarit për t’u transferuar në Turqi.
Edhe tifozët e Besiktasit janë përfshirë fuqishëm në fushatën për ta bindur Sanchon: ata kanë lënë mbi pesë milionë komente nën postimin e fundit të futbollistit në rrjetet sociale, duke e ftuar të luajë për klubin bardhezi sezonin e ardhshëm.
Megjithatë, konkurrenca është e fortë. 24-vjeçari pëlqehet shumë edhe në Itali, me Romën dhe Interin të interesuara seriozisht, ndërkohë që Juventus për momentin nuk ka lëvizur.
Nuk mungon as interesi nga klubet e Arabisë Saudite, ndërsa në sfond mbetet Borussia Dortmund, ish-klubi i Sanchos, që për momentin nuk ka ndërmarrë hapa konkretë për ta rikthyer. Manchester United, duke qenë se kontrata e lojtarit skadon pas 12 muajsh, synon ta shesë përfundimisht gjatë këtij merkatoje.