Portieri spanjoll i Interit, Josep Martínez, është vënë zyrtarisht nën hetim për “vrasje rrugore”, pas aksidentit tragjik të ndodhur mëngjesin e 28 tetorit, rreth orës 09:45, në afërsi të qendrës stërvitore të “Appiano Gentile”.
Sipas raportimeve fillestare të policisë italiane, Martínez, i cili po udhëtonte drejt stërvitjes me automjetin e tij SUV BYD, përplasi fatalisht Paolo Saibene, një 81-vjeçar që po kalonte rrugën në atë moment.
Hetimet e para sugjerojnë se i moshuari mund të ketë humbur ekuilibrin dhe të ketë hyrë papritur në korsi, duke mos i lënë portierit kohë për të reaguar. Rruga u bllokua menjëherë pas ngjarjes për verifikimet e policisë dhe të ekspertëve të qarkullimit rrugor.
Sipas nenit 589-bis të Kodit Penal italian, në rast se provohet shkelje e rregullave të qarkullimit, dënimi për “vrasje rrugore” varion nga 2 deri në 7 vite burg dhe përfshin pezullim të patentës. Në rastet kur përgjegjësia është e kufizuar, dënimi mund të jetë më i lehtë, nga 6 muaj deri në 5 vite burg, së bashku me një gjobë.
Megjithatë, të gjitha të dhënat fillestare flasin për një ngjarje aksidentale, pa elementë të neglizhencës. Nëse konfirmohet se viktima ka humbur kontrollin në mënyrë të papritur, çështja pritet të mbyllet pa pasoja penale për futbollistin, ndërsa dëmshpërblimi civil do të mbulohet nga kompania e sigurimeve.