Në shkollat nga Paqësori deri në Detin e Zi, fëmijët në kopshte veshin uniforma dhe marrin pjesë në praktikën e marshimit. Fëmijët më të mëdhenj po mësohen se si të hapin llogore, të hedhin granata dhe të gjuajnë me municion të vërtetë.
Në shkollat anembanë vendit po lavdërohet shërbimi në forcat e armatosura dhe po krijohen “kompani vullnetare” të adoleshentëve, ku po ndryshohet kurrikula kombëtare për të theksuar mbrojtjen e atdheut.
CNN raporton se fëmijët e Rusisë po përgatiten për luftë. Militarizimi i shkollave publike të Rusisë është intensifikuar që nga pushtimi rus i Ukrainës, i nxitur jo nga një rritje spontane e ndjenjës patriotike, por nga qeveria në Moskë.
Ministri i Arsimit, Sergei Kravtsov, tha kohët e fundit se tani ka rreth 10.000 të ashtuquajtura klube “ushtarake-patriotike” në shkollat dhe kolegjet ruse dhe një çerek milion njerëz marrin pjesë në punën e tyre.
Këto klube janë pjesë e një përpjekjeje të shumanshme që përfshin një rishikim rrënjësor të kurikulës shkollore. Ka klasa të detyrueshme për vlerat ushtarako-patriotike; librat e përditësuar të historisë theksojnë triumfet ushtarake ruse.
Në gusht, Presidenti Vladimir Putin nënshkroi një ligj që prezanton një kurs të ri të detyrueshëm në shkolla: “Bazat e sigurisë dhe mbrojtjes së atdheut”.
Ministria e Arsimit më pas promovoi kurse si pjesë e kësaj nisme për të përfshirë ekskursione në njësitë ushtarake, “lojëra sportive ushtarake, takime me personelin ushtarak dhe veteranët” dhe klasa me drone.
Nxënësit e shkollave të mesme do të mësohen gjithashtu të përdorin municion të vërtetë “nën drejtimin e oficerëve me përvojë të njësisë ushtarake ose instruktorëve ekskluzivisht në vijën e qitjes”, sipas ministrisë.
Një studim i CNN në Rusi zbuloi se fëmijët në moshën shtatë ose tetë vjeç po marrin trajnim bazë ushtarak.
Programi, i cili po testohet këtë vit dhe do të prezantohet në vitin 2024, është krijuar për të rrënjosur te studentët “një kuptim dhe pranim të estetikës së uniformave ushtarake, ritualeve ushtarake dhe traditave luftarake”, sipas një dokumenti të Ministrisë së Arsimit të zbuluar nga media e pavarur ruse.
