Rezultatet e zgjedhjeve në Tuz të Malit të Zi tregojnë për një fitore të plotë të koalicionit“ Forumi Shqiptar” të udhëhequr nga Alternativa Shqiptare e kryetarit aktual të komunës së Tuzit, Nik Gjeloshaj me Lidhjen Demokratike të Shqiptarëve, Unionin Kombëtar Shqiptar dhe Lidhjen Demokratike në Mal të Zi.
Kryetari aktual i komunës së Tuzit në Mal të Zi, Nik Gjeloshaj, ka arritur të marrë fitore në zgjedhjet lokale të mbajtura këtë të diel në këtë komunë. Gjeloshaj kandidonte në siglën e koalicionit “Forumi Shqiptar”, ku përballë ishin edhe 3 koalicione të tjera dhe 3 lista të pavarura.
Fikret Ljuljanaj, anëtar i shtabit zgjedhor të koalicionit “Forumi Shqiptar”, tha se kanë fituar nga 18 deri në 19 mandate, që do të thotë një fitore binsëse.
Pas shpalljes së fitores mbështetësit e Gjeloshajt kanë nisur festën me flamuj shqiptarë dhe fishekzjarrë. Këto janë zgjedhjet e dyta lokale në atë komunë, pasi Tuzi u bë komunë e pavarur vetëm në vitin 2018.
Nga një mandat morën dy parti të vogla të spektrit politik malazez.
Numri i mandateve të fituara i siguron “Forumit Shqiptar” mundësinë që vet të themelojë qeverinë vendore
Në zgjedhjet e së dielës morën pjesë mbi 66 për qind e të elektoratit, i cili numëron mbi 12.000 votues.
Statusi i komunës së pavarur, Tuzit iu rikthye në shtator të vitit 2018 duke e shkëputur atë nga kryeqyteti i Podgoricës. Dekada më parë, Tuzi ishte pjesë administrative e Podgoricës, e më pas një nga komunat urbane të kryeqytetit.
Për gati dy dekada, kërkesa kryesore e forcave politike shqiptare, por edhe e diasporës, ishte pavarësia e plotë e komunës së Tuzit.
Në zgjedhjet e para të vitit 2019, Partia Demokratike e Socialistëve e presidentit Milo Gjukanoviç humbi pushtetin në Tuz, e cila deri atëherë kishte një bazë të fortë elektorale dhe mbante pushtetin në këtë komunë urbane./VOA/
