Gazetarët janë mbledhur në protestë përpara Kryeministrisë. Protesta po zhvillohet pas vendimit të kryeministrit Edi Rama për të mos pranuar për 3 muaj pyetje nga gazetari Klevin Muka, pasi ky i fundit pyeti ministren Olta Xhaçka nëse kishte zbatuar kodin e etikës në raport me bashkëshortin investitor strategjik.
Kreu i Unionit të Gazetarëve, Aleksandër Çipa, tha se rrugë tjetër është edhe bojkoti nga ana e gazetarëve ndaj konferencave të kryeministrit Edi Rama.
”Në emër të unionit të gazetarëve shqiptarë do të doja të këmbëngulim që kryeministri të tërhiqet nga përjashtimi i dy reporterëve. Së pari, Ambrozia Metës dhe Klevin Mukës. Kërkojmë edhe një reagim të Komisionerit Publik për informimin”.
Vetë Rama tha se nuk do të lejojë askënd që të shkelë normat etike në praninë e tij. Ai ka paralajmëruar përsëri gazetarët të cilët i bëjnë pyetje, që sipas tij, konsiderohen jashtë normave të etikës se nuk janë mirëseardhur në konferenca për mediat.
