Me ligj, ministrave do t’u ndalohet takimi me biznesmenë. Po ashtu ata s’mund të pranojnë bileta të paguara nga persona dhe kompani private apo edhe të frekuentojnë bare e restorante gjatë ditëve të punës.
Në mënyrë specifike ministrave iu ndalohet bixhozi.
Rregullat e paralajmëruara nga kryeministri Edi Rama në nisje të mandatit të tretë të qeverisjes, dhe të miratuara në shtator të vitit të shkuar nga Këshilli i Ministrave, kanë hyrë në fuqi të premten e 29 prillit.
“Kodi i Ri Etik” lejon takimin me grupe biznesi vetëm në prani të 2 nëpunësve publikë të cilët mbajë minutat e takimeve, identitetin e personave dhe shënojnë në një regjistër të posaçëm çështjet e diskutuara.
Ministrat do të ndalohen tashmë ligjërisht të udhëtojnë me “Bussines Class”, të përdorin sallën VIP të aeroportit apo makinën e punës për familjarët në momentin që nuk janë vetë të pranishëm. Kryeministri ka ndaluar edhe organizimin e festave për personelin me fondet e buxhetit apo pushimet jashtë vendit.
