Gazetari nxjerr shifrat, Maqedonia e Veriut mbetet pas Shqipërisë në fondet e KE-së

Pretendimi i Ministrit të Punëve dhe Tregtisë së Jashtme të Maqedonia e Veriut, Timcho Mucunski, se vendi i tij ka përfituar më shumë fonde nga Komisioni Europian sesa Shqipëria, ka shkaktuar debat në opinionin publik maqedonas. Ministri publikoi në rrjetet sociale shifrën prej 65.7 milionë eurosh të përfituara nga Maqedonia e Veriut, duke e paraqitur atë si një sukses rajonal dhe si tregues se vendi renditet para Shqipërisë në përfitimin e fondeve europiane.

Megjithatë, gazetari Sefer Selimi e ka kundërshtuar publikisht këtë interpretim, duke sqaruar se ministri ka paraqitur vetëm një këst të izoluar të pagesave dhe jo panoramën e plotë të fondeve të disbursuara nga Komisioni Europian.

Sipas Selimit, pagesa prej 65.7 milionë eurosh për Maqedoninë e Veriut përfaqëson vetëm këstin e tretë gjashtëmujor, ndërsa Shqipëria në të njëjtën periudhë ka marrë 49 milionë euro dhe Mali i Zi 44.2 milionë euro. Ai thekson se këto pagesa nuk janë një garë mes vendeve të rajonit, por bazohen në përmbushjen e reformave specifike të kërkuara nga Bashkimi Europian.

Gazetari nënvizon se, sipas të dhënave zyrtare të Komisionit Europian, shuma totale e fondeve të liruara deri tani arrin në 212.8 milionë euro për Shqipërinë, 142.1 milionë euro për Maqedoninë e Veriut dhe 89.3 milionë euro për Malin e Zi. Kjo tregon se Shqipëria mbetet dukshëm përpara fqinjëve të saj në totalin e fondeve të përfituara.

Selimi kujton gjithashtu se në këstin e mëparshëm Shqipëria kishte marrë 99.3 milionë euro, ndërsa Maqedonia e Veriut vetëm 15.9 milionë euro, çka sipas tij lidhet drejtpërdrejt me nivelin e përmbushjes së reformave të kërkuara nga BE-ja.

Ai thekson se fondet europiane nuk jepen për propagandë politike, por vetëm pas verifikimit të reformave konkrete. Madje, sipas tij, Maqedonia e Veriut ka humbur rreth 70 milionë euro për shkak të mosrealizimit të disa kushteve reformuese të kërkuara nga Komisioni Europian.