Hapet kufiri Kosovë – Shqipëri, nga sot kalimi pa kontrolle

Qytetarët nga Shqipëria dhe Kosova do të mund të lëvizin pa kontrolle kufitare nga 1 maji deri më 30 shtator, në zbatim të marrëveshjes së nënshkruar mes dy qeverive në pranverën e vitit 2024.

Marrëveshja ka hyrë sërish në fuqi këtë të premte, duke lehtësuar ndjeshëm qarkullimin e qytetarëve gjatë sezonit turistik dhe duke reduktuar pritjet në pikat kufitare.

Sipas saj, qytetarët e të dy vendeve mund të kalojnë kufirin pa pasaportë apo kartë identiteti gjatë dy periudhave të vitit: nga 1 maji deri më 30 shtator dhe nga 1 nëntori deri më 28 shkurt të vitit pasardhës.

Në total, marrëveshja parashikon nëntë muaj në vit me qarkullim të lirë, një masë që synon të forcojë bashkëpunimin mes dy vendeve dhe të nxisë turizmin, tregtinë dhe lëvizjen e lirë të qytetarëve.