Në mbledhjen e Grupit Parlamentar dhe kabinetit qeveritar u prezantuan qasje dhe instrumente të reja që synojnë të forcojnë komunikimin mes institucioneve dhe qytetarëve, duke e bërë atë më të drejtpërdrejtë, transparent dhe të përgjegjshëm.
Nënkryetarja e Kuvendit, Klodiana Spahiu, edhe pse nuk ka reaguar ende për lajmin se do të jetë ministrja e re e Shëndetësisë, shkruan në një postim në Facebook, se në kuadër të kësaj qasjeje të re janë prezantuar katër instrumente: “PasqyrAlbania”, “Prania Besnike”, “BESA” dhe “Radar”. Sipas saj, këto iniciativa synojnë të vendosin qytetarin, informacionin dhe llogaridhënien në qendër të marrëdhënies mes institucioneve publike dhe shoqërisë.
Qasja e re synon një komunikim më të hapur me publikun, si dhe një rol më aktiv të institucioneve në informimin dhe ndërveprimin me qytetarët. “Një qeverisje më e hapur dhe më pranë qytetarit është një hap i rëndësishëm drejt një Shqipërie më moderne, më europiane dhe më të besueshme”, u shpreh Spahiu.
Nënkryetarja e Kuvendit, Klodiana Spahiu do të drejtojë Ministrinë e Shëndetësisë dhe Mirëqenies Sociale, pas dorëheqjes së Evis Salës. Vendimin për të rikthyer në krye të institucionit një emër politik, Edi Rama e lajmëroi në takimin e zgjeruar të grupit parlamentar. Klodiana Spahiu është deputete në Kuvendin e Shqipërisë që prej vitit 2009. U nevojit mandati i pestë si e zgjedhur e PS-së për të fituar besimin e Edi Ramës për ta marrë në kabinetin e tij qeveritar.