Në qoftë se zgjedhjet parlamentare do të zhvilloheshin sot në Shqipëri, rreth 290,000 pjesëmarrës të zgjedhjeve të 23 qershorit 2013, nuk do të ishin të gatshëm të votonin për ndonjë nga partitë aktuale. Ky rezultat bazohet në sondazhin e serisë BAROMETER, të cilin e paraqita dje në emisionin “Opinion” të Blendi Fevziut.
Për këtë sondazh, u kontaktuan me telefon fiks1200 persona të moshave të ndryshme, ku secili përfaqësonte mesatarisht 1700 banorë të moshës madhore në të gjithë territorin e Shqipërisë (preferencat politike në zonat rurale janë presupozuar të njëjta me ato urbane, sepse në zgjedhjet e vjetshme, raportet mes koalicioneve ishin praktikisht të njëjta si në fshat edhe në qytet).
Ndër 1200 të anketuarit, 1073 ishin votues aktivë – ata ose kishin marrë pjesë në zgjedhjet e Qershorit 2013, ose s’kishin marrë pjesë në zgjedhje vjet, por janë gati të votojnë sivjet për një nga partitë aktuale. Ndërsa 127 të anketuar ishin votues që s’kanë votuar e që prapë s’votojnë – ata përfaqësojnë rreth 220 mijë banorë në moshë madhore (127 të anketuar X 1700), që praktikisht, ia kanë deleguar zgjedhjen e tyre votuesve aktivë.
Ndër 1073 të anketuarit aktivë, 171 kishin votuar vjet, por nuk janë gati të votojnë sivjet. Kjo shifër, e përkthyer në vota në nivel kombëtar, do të thotë se rreth 290,000 pjesmarrës të zgjedhjeve të vjetshme nuk janë gati të votojnë sot për ndonjë nga partitë aktuale (171 të anketuar X 1700). Ndërkohë, 65 të anketuar aktivë nuk kishin votuar vjet për arsye të ndryshme (moshe, udhëtimi, shëndeti, dëshire), por janë gati të votojnë sot për njërën nga partitë aktuale. Kjo shifër, e përkthyer në vota në nivel kombëtar, do të thotë se votues të tillë janë rreth 110,000 (65 të anketuar X1700).
Sa shqiptarë do të votonin sot për secilin koalicion
Duke përdorur të njëjtën metodologji llogaritje si më sipër, rezulton se sot janë gati të votojnë për një nga partitë e Koalicionit të Majtë rreth 880,000 banorë të Shqipërisë në moshë madhore (518 të anketuar X 1700). Në 23 Qershor, këtë koalicion e votuan rreth 1 milionë shqiptarë. (Në Koalicionin e Majtë, PS-ja ka aktualisht rreth 650 mijë vota, nga 710 mijë që kishte vjet, ndërsa LSI-ja ka aktualisht rreth 200 mijë vota, nga 180 mijë vjet)
Nga ana tjetër, partitë e Koalicionit të Djathtë votohen sot nga rreth 620,000 banorë të Shqipërisë në moshë madhore (365 të anketuar X 1700). Në 23 Qershor, këtë koalicion e votuan rreth 680,000 shqiptarë. (Në Koalicionin e Djathtë, PD-ja ka aktualisht rreth 600 mijë vota, nga 530 mijë që kishte vjet. Kuota aktuale e saj është më e larta e regjistruar në serinë e sondazheve BAROMETER)
Përmbledhje e llogaritjeve të mësipërme
Në qoftë zhvillohen sot zgjedhje parlamentare, rreth 16% e TË GJITHË banorëve të Shqipërisë në moshë madhore janë të vendosur të mos votojnë, 10% nuk janë të vendosur nëse do të votojnë apo jo, 43% do të votonin për partitë e Koalicionit të Majtë, 30% do të votonin për partitë e Koalicionit të Djathtë, dhe 1% do të votonin FRD+AK (Me afërsi: 320 mijë s’votojnë, 200 mijë janë të pavendosur, 880 mijë votojnë majtas, 620 mijë votojnë djathtas, dhe 20 mijë FRD+AK)
Opinioni për politikanët kryesorë
Vetëm 1073 të anketuarit aktivë u pyetën për opinionin rreth katër politikanëve kryesorë dhe u përgjigjën kështu:
Për Ramën: 60% pozitiv, 30% negativ, 10% s’e di
Për Metën: 45% pozitiv, 39% negativ, 16% s’e di
Për Bashën: 40% pozitiv, 39% negativ, 21% s’e di
Për Berishën: 34% pozitiv, 55% negativ, 11% s’e di.
Shumica dërrmuese e atyre votuesve të djathtë që nuk janë gati të rivotojnë sot, kanë opinion pozitiv për Bashën, por jo për Berishën. Në serinë BAROMETER, kuota pozitive më e ulët për Ramën ka qenë në javën e protestave kundër armëve kimike, 50%. Në javën e “aeroplanit të Divjakës”, kjo kuotë ishte 54%, dhe para vizitës së Ramës në Beograd, ishte 57%.
Çështjet e ditës
1-Ndër 1073 të anketuarit aktivë, 30% ishin dakord me ndryshimet e taksave që po bën qeveria, ndërsa 48% nuk ishin dakord.
2- Ndër 1073 të anketuarit aktivë, 65% ishin dakord me mënyrën e zhvillimit të fushatës së qeverisë për prishjen e ndërtimeve pa leje, ndërsa 30% nuk ishin dakord.
Shënim:
Kampioni u balancua gjeografikisht, demografikisht dhe politikisht, për të përfaqësuar sa më saktësisht popullsinë në moshë madhore. Maksimumi i marzhit të gabimit statistikor është plus/minus 3.3%