Ambasada e Shteteve të Bashkuara në Tiranë ka publikuar një njoftim sigurie për qytetarët amerikanë në lidhje me protestën e opozitës që pritet të zhvillohet mbrëmjen e sotme në kryeqytet.
Sipas njoftimit, protesta është planifikuar të nisë në orën 19:00 në Bulevardin “Dëshmorët e Kombit”, në segmentin mes Sheshit “Skënderbej” dhe Sheshit “Nënë Tereza”, pranë godinës së Kryeministrisë. Ambasada paralajmëron se tubimi mund të zgjerohet edhe në zonat përreth, ndërsa pritet prani e shtuar e forcave të policisë, bllokime rrugësh dhe ndërprerje të trafikut.
Në reagimin zyrtar theksohet se protestat dhe tubimet e mëdha shpesh fillojnë në mënyrë paqësore, por situatat mund të ndryshojnë me shpejtësi, duke sjellë devijime të qarkullimit dhe mbyllje të akseve rrugore pranë institucioneve qeveritare.
Ambasada u ka kërkuar qytetarëve amerikanë të shmangin pjesëmarrjen në protestë dhe të tregojnë kujdes të shtuar gjatë lëvizjes në Tiranë. Gjithashtu, këshillohet që qytetarët të jenë të vetëdijshëm për ambientin përreth, të shmangin shpërqendrimet në publik, të ndjekin mediat lokale për informacion të përditësuar dhe të kenë gjithmonë një plan emergjence ose strategji daljeje.
Sipas njoftimit, edhe personelit të ambasadës i është rekomanduar të shmangë zonën ku do të zhvillohet protesta.