Arbër Hajdari ka reaguar me një mesazh të ndjerë dhe tronditës pas aksidentit tragjik të ndodhur në Durrës, ku dy fëmijë humbën jetën dhe një i tretë u transportua drejt Tirana në gjendje kritike.
Përmes një postimi në rrjetet sociale, ai ka shprehur dhimbjen e thellë për këtë ngjarje që ka prekur jo vetëm familjet e viktimave, por gjithë opinionin publik. “Jam thellësisht i trishtuar nga tragjedia e rëndë e ndodhur sot në Durrës, ku dy fëmijë humbën jetën, ndërsa një tjetër ndodhet në gjendje kritike për jetën. Një ngjarje që na trondit të gjithëve dhe që duhet të na bëjë të reflektojmë seriozisht si shoqëri,” – shkruan ai.
Në reagimin e tij, Hajdari thekson nevojën urgjente për ndërgjegjësim dhe masa konkrete për të parandaluar tragjedi të tilla, duke vënë theksin te siguria rrugore si një përgjegjësi kolektive. Ai apelon për më shumë kontroll, më shumë përgjegjësi individuale dhe institucionale, si dhe për ashpërsim të masave ndaj çdo shkeljeje që rrezikon jetën e qytetarëve, veçanërisht të më të pambrojturve.
“Nuk mund të vazhdojmë të zgjohemi çdo ditë me lajme tragjike nga rrugët tona. Siguria në rrugë nuk është privilegj, por detyrim,” – vijon ai, duke artikuluar një shqetësim që po bëhet gjithnjë e më i pranishëm në realitetin shqiptar.
Mesazhi i tij mbyllet me një lutje të ndjerë për familjet që po përjetojnë këtë humbje të rëndë dhe për fëmijën që po lufton për jetën. Ai shpreh solidaritet dhe dhimbje njerëzore, duke e kthyer këtë reagim në një thirrje për reflektim dhe përgjegjësi të përbashkët.
“Zoti i bëftë të durueshëm familjarët për ta përballuar këtë dhimbje të madhe. U prehshin në paqe engjëjt e vegjël. O Zot, na ruaj fëmijët!” – përfundon mesazhi i tij.
Albert Vataj