FotoALBUMI i JAVËS, nga memorandumi për hub-in energjetik të Vlorës, tek hapja e Muzeut Arkeologjik të Durrësit

Kryeministri Edi Rama publikoi sot fotoalbumin me momentet kryesore të aktiviteteve të zhvilluara gjatë javës.

Gjatë kësaj jave në Tiranë u nënshkrua memorandumi për zhvillimin e hub-it energjetik të Vlorës dhe marrëveshja kuadër për furnizimin me gaz të lëngshëm natyror mes Shqipërisë, Greqisë dhe SHBA-së.

Gjatë ceremonisë së nënshkrimit të këtij memorandumi Rama theksoi se ajo do të sjellë një investim shumë të madh dhe teknologji moderne.

“Këto marrëveshje janë pjesë e një transformimi që ne po e nisim nga Vlora. Ajo që ishte një aset i vetëm, po bëhet një portë dhe ai çfarë sot është ende një aset që nuk kemi mundur ta përdorim për shkak të mënyrës krejt të gabuar të investimit të parave të shqiptarëve do të shndërrohet në një aset kaq të vlefshëm sa që do t’i japë Shqipërisë pozitën e një qendre energjetike që përfshin prodhimin e energjisë, infrastrukturën dhe tregjet rajonale”, tha Rama.

Gjithashtu këtë javë u rihap Muzeu Arkeologjik i Durrësit, pas restaurimit të tij në kuadër të programit “EU4Culture”.

I pranishëm në ceremoninë e përurimit Kryeministri Rama vlerësoi se kjo ringritje u bë e mundur falë solidaritetit dhe bashkëpunimit të ngushtë me BE-në, që vuri në dispozicion programin “EU4Culture”.

“Ne bëmë gjithçka na takonte që me projektet dhe vullnetin e duhur të çonim përpara këtë program. Ka ende disa objekte në proces, por është bërë një punë transformuese që flet vetë”, tha Rama.

Javën që po lëmë pas u hap plotësisht për qarkullim edhe segmenti i zgjeruar i autostradës Tiranë-Durrës deri te mbikalimi i Rinasit.

Kryeministri Edi Rama, i shoqëruar nga ministri i Infrastrukturës dhe Energjisë Enea Karakaçi dhe drejtori i ARRSH-së, Ami Kozeli, inspektoi këtë segment rrugor, i cili ka kaluar tashmë në një autostradë të Kategorisë A.

Segmenti i përfunduar tashmë është me 4 korsi dhe është realizuar me teknologji të re asfaltimi, e përdorur për herë të parë në vend, duke përmirësuar ndjeshëm standardin dhe sigurinë rrugore.

Shqipëria do të mirëpresë elitën e padelit botëror me turneun “FIP Platinum Albania 2026”, i cili do të zhvillohet në Tiranë, në datat 26-30 maj, në sheshin “Skënderbej”.

Në një konferencë të përbashkët me mediet me presidentin e Federatës Ndërkombëtare të Padelit, Luigi Carraro, ministri i Turizmit, Kulturës dhe Sportit, Blendi Gonxhja tha se ky do të jetë një organizim nga më të rëndësishmit për peshën ndërkombëtare dhe specifikës që ka si aktivitet.

“Është një sinjal tjetër i një mikpritjeje të shkëlqyer për sportistët më të mirë të botës që shoqërohen nga trajnerët e elitës, ekspertë dhe nga medie ndërkombëtare”, tha Gonxhja.