Ironia e Ylli Manjanit: Meqë GJKKO me një kafaz xhami të blinduar është “hotel me 5 yje”, mund ta bëjmë dhe me 7

Nga Ylli Manjani

Kam një propozim.
Meqë GJKKO me një kafaz xhami të blinduar është “hotel me 5 yje”, mund ta bëjmë me 7.
Fusim edhe prokurorët në një kafaz tjetër me xham të blinduar, përballë me kafazin e të pandehurve. Të hyjnë e të dalin edhe ata, në kafazet e tyre nga korridoret e nëndheshme plot aroma, pisllëk e jetë dhe, të jenë përballë me të pandehurit nga blindi në blind. Ti shohim edhe ata njëherë se si komunikojnë me sallën nga vrimat e xhamit, apo kur ti zgjasin qafat si gjela deti për të arritur mikrofonët që janë diku lart afër tavanit.
Madje unë them që edhe gjykatës t’i vëmë një mburojë xhami të blinduar që të ruhet nga goditjet e xhamave të blinduar që janë në sallë.
Avokatëve dhe gazetarëve, aty ku janë ndenjëset e publikut, t’u bëjnë një pishinë e të rrinë aty, me rroba banjo të zeza kuptohet. Se duhet një pishinë për hotele me kaq yje… Ashtu nga pishina të flasin me xhamat e blinduar më mirë, se me njerëzit skanë gjë në terezi.
T’i blindojmë të gjithë aty dhe të shpëtojmë. Kështu respektohet edhe barazia e palëve në gjykim, edhe dinjiteti i pjesmarrësve në gjykim edhe siguria edhe të tëra.
Pra në vend të heqim një kafaz shtojmë edhe 2 të tjerë.
I bëjmë sallat e gjyqeve kopësht zoologjik arinjsh juridikë dhe shpëtojmë.
Kështu gjykatat bëhen me 7 yje. Më të veçantat në botë.