“Jarna” në Tiranë një ambient që promovon shijen, traditën dhe punën e prodhuesve tanë

Rritja e vizitorëve në Tiranë dhe kërkesa gjithnjë e më e madhe për eksperienca autentike kulinare, po nxisin hapjen e hapësirave të reja që promovojnë produktet vendase.

Kryeministri Edi Rama, ndau në rrjetet sociale pamje nga restorant “Jarna”, në kryeqytet, i cili ofron një kuzhinë dhe ambient tradicional.

““Jarna” në Tiranë. Një kënd i bukur që promovon shijen, traditën dhe punën e prodhuesve tanë”, shkruan Rama.

Tirana është një nga qytetet më të gjalla të Evropës Juglindore që është kthyer në një qendër atraksioni turistik për turistë të huaj nga rajoni, Evropa, por edhe më gjerë.

Në vetëm 15 kilometra katrorë sipërfaqe, në Tiranë mund të shijosh thuajse të gjitha format e turizmit, duke nisur nga ai kulturor, historik, duke vijuar te turizmi arkitekturor e kulinar, e mandej te turizmi malor dhe ai i aventurës.

Disa prej pikave atraktive, që mund të vizitojnë turistët e huaj në Tiranë, por dhe në rrethina, janë Mozaiku i Tiranës, Kulla e Sahatit, Xhamia e Et’hem Beut, Tyrbja e Kapllan Pashës, Kalaja e Tiranës, qendra e Tiranës “Ansambël Monumental”, Ura e Tabakëve, Kalaja e Petrelës, Muzeu Historik Kombëtar, “Bunk’art” 1 dhe 2, Muzeu Kombëtar “Shtëpia me gjethe”, etj. Grupet e turistëve i gjen kryesisht te sheshi “Skënderbej”, te Kalaja e Tiranës dhe te Pazari i Ri.