Ministrja Spahiu: Qytetari ta ndjejë punën e institucioneve të shëndetësisë aty ku ka nevojë, jo vetëm në letra

Ministrja e Shëndetësisë dhe Mirëqenies Sociale, Klodiana Spahiu, zhvilloi sot një takim me drejtuesit e institucioneve në varësi të MMSHS-së, ku në fokus ishte rritja e cilësisë dhe efektivitetit të shërbimeve që u ofrohen qytetarëve. Gjatë takimit, ministrja nënvizoi se puna e institucioneve duhet të jetë e prekshme për qytetarët dhe të reflektohet drejtpërdrejt në shërbimet që ata marrin.

“Qytetari nuk duhet ta shohë punën tonë vetëm në dokumente apo raporte. Rezultati duhet të ndihet aty ku ai ka nevojë për shërbim dhe mbështetje”, u shpreh Spahiu. Ajo kërkoi nga drejtuesit hartimin e planeve konkrete të punës, forcimin e kontrolleve në terren dhe një qasje më të përgjegjshme në menaxhimin e burimeve njerëzore. “Cilësia e shërbimit fillon nga njerëzit që janë në kontakt me qytetarin. Përzgjedhja e personelit dhe përgjegjësia që secili mban në detyrë janë thelbësore për të garantuar shërbime cilësore”, theksoi ministrja.

Një vëmendje e veçantë iu kushtua edhe personave me aftësi të kufizuara. Spahiu kërkoi që mbështetja për këtë kategori të mos kufizohet në procese administrative, por të jetë e vazhdueshme dhe e koordinuar. “Për personat me aftësi të kufizuara, mbështetja duhet të jetë e plotë dhe pa ndërprerje. Nuk mund të lejojmë që qytetari të përballet me vonesa, pengesa apo ndalesa gjatë marrjes së shërbimeve që i takojnë”, deklaroi ajo.

Në përfundim të takimit, ministrja u kërkoi drejtuesve të institucioneve që të fokusohen te rezultatet konkrete, të rrisin kontrollin dhe monitorimin e punës dhe të shmangin justifikimet për problematikat që mund të zgjidhen përmes një menaxhimi më të mirë. “Na duhet më shumë punë konkrete, më shumë prani në terren dhe më shumë përgjegjësi. Qytetari duhet të shohë dhe të ndiejë ndryshimin në shërbimin që merr”, përfundoi Spahiu.