Ndërtimi i Batalionit III në Pocestë, Nufi: Modernizim për kushte më të mira stërvitjeje

Ministri i Mbrojtjes, Ermal Nufi, ka inspektuar nga afër punimet për ndërtimin e godinës së re të Batalionit III të Regjimentit të Këmbësorisë së Jugut, në zonën e Pocestës.

Përmes një reagimi në rrjetet sociale, ministri theksoi se zgjerimi i pranisë së Forcat e Armatosura të Shqipërisë në territor përkthehet në më shumë siguri për qytetarët, por edhe në një afrim më të madh mes ushtrisë dhe komunitetit.

Sipas tij, investimi në infrastrukturën ushtarake synon të përmirësojë ndjeshëm kushtet e punës dhe stërvitjes për efektivët, duke i përshtatur ato me standardet moderne.

Godina e re e Batalionit III konsiderohet një hap i rëndësishëm në fuqizimin e kapaciteteve të forcave tokësore, në kuadër të modernizimit të ushtrisë shqiptare.