Përgatitjet për hapjen e qendrave shëndetësore verore në pikat kryesore turistike dhe ato te pelegrinazhit, janë në fazën përfundimtare, ministrja e Shëndetësisë dhe Mbrojtjes Sociale, Evis Sala u kujtoi mjekëve dhe inferimierëve të aplikojnë deri më 27 prill.
Këtë vit do të hapen 36 qendra shëndetësore verore në të gjithë vendin me risinë që dy prej tyre do të jenë në shërbim të pelegrinëve në Kishën e Laçit dhe tjetra në shërbim të atyre që do të frekuentojnë këtë vit Llixhat e Elbasanit.
Janë rreth 250 vende pune në total (100 mjekë dhe 150 infermierë) sikundër edhe personal mbështetës të cilët do të shërbejnë në zonat turistike bregdetare dhe malore të cilat do të jenë funksionale 24/7 nga qershori deri në shtator.
Këto qendra synojnë të garantojnë kujdes shëndetësor cilësor për turistët vendas dhe të huaj gjatë pikut të sezonit.
Ministrja Sala ishte e pranishme dhe bisedoi me stafin në qendrën shëndetësore verore në Malin e Robit që funksionon së bashku me atë të Spillesë dhe Golemit e mban peshë kryesore në mbarëvajtjen e sezonit turistik veror në bregdet.
Sala bëri thirrje të veçantë për aplikim për personel mjekësor në disa qendra shëndetësore malore si Boga, Tamara, Valbona dhe Thethi.