Qytetari i sëmurë në zyrën e ministres, Spahiu: Prania Besnike nuk është veç fjalë, rasti është referuar për ndjekje në Turqi

Ministrja e Shëndetësisë dhe Mirëqenies Sociale, Klodiana Spahiu ka reaguar lidhur me rastin e qytetarit Albi Sula, për të cilin janë ngritur publikisht pretendime nga opozita se nuk është pritur nga institucionet.

Përmes një reagimi në rrjetet sociale, Spahiu deklaron se e ka pritur personalisht Sulën në zyrën e saj, së bashku me nënën e tij, ku sipas ministres është diskutuar problematika shëndetësore dhe trajtimi i tij. “Qytetari në foto është Albi Sula. Së bashku me nënën e tij, e prita dje personalisht në zyrën time”, shkruan Spahiu.

Ministrja thotë se gjatë takimit është diskutuar ndjekja e rastit nga strukturat shëndetësore dhe Ministria e Shëndetësisë dhe Mirëqenies Sociale, si dhe hapat e mëtejshëm për trajtimin e tij.

Spahiu sqaron gjithashtu se Sula është trajtuar dhe ndjekur nga mjekët e Spitalit Onkologjik në QSUT, ndërsa rasti, sipas saj, është referuar për ndjekje të mëtejshme në Turqi, në përputhje me procedurat administrative dhe kontratën me spitalin përkatës.

Postimi i plotë

Qytetari në foto është Albi Sula. Së bashku me nënën e tij, e prita dje personalisht në zyrën time. E dëgjova me vëmendje për problematikën e tij shëndetësore dhe rrugëtimin e vështirë të trajtimit. Sqaruam hap pas hapi ndjekjen e rastit nga strukturat shëndetësore dhe Ministria e Shëndetësisë dhe Mirëqenies Sociale, si edhe hapat që do të vijojnë. Përballë disa pretendimeve të bëra publikisht nga opozita, faktet janë të qarta:

• Qytetari për të cilin pretendohet se nuk është pritur, ka qenë dje në zyrën time, përballë meje dhe nënës së tij.
• Ai është trajtuar dhe ndjekur nga mjekët e Spitalit Onkologjik në QSUT, sipas nevojave dhe protokolleve mjekësore.
• Në zbatim të procedurave administrative dhe kontratës me spitalin përkatës, rasti i tij është referuar për ndjekje të mëtejshme në Turqi.
Të bësh politikë është legjitime. Të kritikosh është e drejtë. Por një problem shëndetësor nuk duhet të kthehet në mjet për të ndërtuar një akuzë që nuk përputhet me faktet.

Për mua, përpara çdo debati politik është qytetari dhe halli i tij. Dyert e Ministrisë së Shëndetësisë dhe Mirëqenies Sociale janë dhe do të mbeten të hapura. Për të dëgjuar, për të sqaruar dhe, aty ku është e mundur, për të gjetur zgjidhje. Sepse PraniBesnike nuk është slogan. Është përgjegjësi ndaj qytetarit.