Kryeministri Edi Rama mbajti fjalën e tij në sesionin e hapjes së Kongresit Botëror të Ligjit, një ngjarje që do të mbledhë vitin e ardhshëm në Shqipëri personalitetet më të rëndësishme të drejtësisë ndërkombëtare.
Në fjalën e tij, Rama nuk i kurseu batutat me ministrin e Drejtësisë së Francës duke i thënë “nëse doni që PSG të fitojë finalen, më 30 maj duhet të vini në Tiranë”.
“I nderuar ministër i Drejtësisë i Republikës së Francës, zoti Darmanin, mirë se erdhët në Tiranë! Ju jemi thellësisht mirënjohës për ndihmën tuaj në rrugëtimin tonë të vështirë. Dhe në shenjë mirënjohjeje për gjithçka ju dhe qeveria juaj, si dhe Presidenti, po bëni për të mbështetur procesin e reformimit dhe të zbatimit të Reformës në Drejtësi, ne patëm dje kënaqësinë të festonim fitoren e Paris Saint-Germain-it, të cilën së bashku e pritëm me shumë padurim. Kështu që, nëse doni të fitoni edhe finalen, hajdeni përsëri në Tiranë më 30 maj”, tha Rama.
