Me rastin e Ditës Ndërkombëtare të Punëtorëve, zëvendëskryeministrja Albana Koçiu përcolli një mesazh vlerësimi dhe mirënjohjeje për të gjithë qytetarët që kontribuojnë çdo ditë në zhvillimin e vendit.
Përmes një postimi në rrjetet sociale, Koçiu shprehet se pas çdo profesioni dhe uniforme qëndrojnë individë me histori, pasione dhe përkushtim ndaj familjes dhe shoqërisë.
“Përtej uniformës, është Aida, Ledjoni, Erioli, Muharremi, Arjola, Lefteri… Secili ka historinë e vet, pasionet dhe kohën e çmuar që ndan me miqtë dhe familjen. Edhe pse në profesione dhe rrugë të ndryshme, i bashkon diçka e madhe: Punojnë me përkushtim për 🇦🇱Shqipërinë dhe besojnë te e ardhmja europiane e saj.
Mirënjohje për këdo që kontribuon çdo ditë për vendin, duke sakrifikuar shpesh herë kohën nga familja dhe vetja.
Qeveria Shqiptare do të vijojë me reforma që synojnë rritjen e pagave, përmirësimin e kushteve të punës dhe krijimin e mundësive të barabarta për të gjithë”, tha Koçiu.
