Alibeaj: Marrëveshja Xhafaj-Marku, ja si Edi Rama po kap SPAK

Enkelejd Alibeaj, deputet i PD-së, tha në studion e Syri.net se marrëveshja e nënshkruar mes Ministrisë së Brendshme dhe Prokurorisë së Përgjithshme është e pakutimtë, përveç se anti-ligjore, pasi qeveria dhe prokuroria mund të bashkohen mes tyre vetëm në sallën e gjyqit.

Alibeaj tha se sipas Ambasadorit amerikan prokurorët që do të hetojnë korrupsionin dhe krimin e organizuar duhet të jenë të paprekshëm.

“Po nga do të jenë të paprekshëm këto prokurorë të seksioneve? Nga qeveria”, tha Alibeaj.

Referuar marrëveshjes, Alibeaj tha se ajo përcakton se prokurorët e rinj do të zgjidhen pasi të kalojnë filtrin e 3 institucioneve që janë nën kontrollin e Edi Ramës, një prej të cilëve është edhe SHISH-i.

“Sot as me Kushtetutë dhe as me ligj synohet që kjo të bëhet vetëm me një urdhër, që e ka nxjerrë Kryeministri, të cilit i bindet Fatmir Xhafaj sepse janë pjesë e një bande në qeveri dhe marrin me vete edhe Kryeprokuroren”, tha Alibeaj.

Sipas tij, me marrëveshjen e nënshkruar mes Xhafajt dhe Arta Markut, i vihet kryqi Kushtetutës, ligjit dhe kërkohet të krijohet SPAK.

“E gjithë kjo bëhet për të mbrojtur Sajmir Tahirin, i cili është kreu i bandës së Habilajve. Tashmë prokuroria është në duart e Kryeministrit Edi Rama dhe mund të presim gjithçka të ndodhë. Kryeprokurorja është emëruar në kundërshtim me Kushtetutën, nuk ka kaluar vetingun, është votuar me 69 votat e Edi Ramës, pra kemi një shmangie flagrante në rastin e Prokurores së Përgjithshme”, tha Alibeaj.

Duke komentuar ekstradimin e Nezar Seitajt, Alibeaj tha se duke zgjedhur këtë proçedurë, Edi Rama dhe Sajmir Tahiri, ia hoqën drejtësisë nga duart financierin e Habilajve, i cili ishte gati të kthehej në të penduar.

“Rama mbrojti Tahirin, pasi ai e kërcënoi hapur se do të fliste, pra do e merrte me vete. Rama kërkoi prova, dhe prova ishte Nezir Seitaj, financieri i bandës. Çfarë bëri Rama? Kapi Prokurorinë e Përgjithshme duke zgjedhur Kryeprokuroren e përkohshme. Çfarë bëri më tej? E rrëmbeu të penduarin dhe e çoi në Itali, duke i hequr nga duart Prokurorisë së Krimeve të Rënda, që ende se ka kapur dot, provën. Çfarë mund të bëjë një prokurori pa prova? Asgjë”, tha Alibeaj.