“Harroni çështjen çame”, reagon ashpër PD: Deklarata e Presidentit grek, arrogante dhe anti-europiane

Partia Demokratike dënon ashpër deklaratën e djeshme të Presidentit të Greqisë, Prokopis Pavlopulos, i cili e konsideron të pakuptimtë shtrimin e çështjes çame nga Shqipëria në kohën kur kërkohet perspektiva evropiane.

Reagimi i selisë blu vjen nga kreu i Departamentit për Politikën e Jashtme, Kreshnik Çollaku, i cili thekson se deklarata e presidentit grek për Çamërinë është arrogante dhe e papranueshme.

Përmes reagimit në faqen e tij zyrtare në rrjetin social “Facebook”, Çollaku shprehet se deklarata e kreut të shtetit helen nuk ka asnjë lidhje me frymën e Europës me të cilën ai po kërcënon Shqipërinë në lidhje me çështjen e integrimit.

Reagimi i plotë i Kreshnik Çollakut

Arrogante dhe e papranueshme deklarata e presidentit grek për Çamërinë.

Çamëria është pjesë e identitetit kombëtar të shqiptarëve.

Integrimi Evropian është një interes kombëtar i shqiptarëve .

Por Evropa që shqiptarët ëndërrojnë është ajo e respektit te identiteteve dhe lirive të çdo individi apo kombi…

Nuk e di për cilën Evropë flet presidenti grek…por e sigurtë është se nuk flet për Evropën që njohim e duam.