Kokëdhima i thotë Jo Ramës: Nuk kam ndërmend të pleqëroj në Vuno

Edi Rama mori një refuzim të thatë nga njeriu që kishte përzgjedhur për të kaluar pleqërinë e tij. Koço Kokëdhima i tha Jo publikisht propozimit që iu bë edhe ai publikisht nga fshatrat e Jugut, për të kaluar bashkë me Edi Ramën ditët e fundit të jetës.

Dhe si për t’ia bërë më të prekshme vetminë që e pret ish mikun e tij, Kokëdhima ishte sot në Dhërmi dhe nuk takoi fare kryeministrin.

Në Edicionin Veror të ABCNews, Kokëdhima u pyet nga gazetari Eni Shehu për propozimin që i bëri disa muaj më parë Edi Rama, për të pleqëruar bashkë në Vuno. Dhe duke parë afrimin e tij me Ilir Metën, për Koço Kokëdhimën duket se shtohen alternativat e pleqërimit, qoftë edhe në Gjirin e Lalëzit.

“Për këtë punën e pleqërimit unë them se nuk do pleqëroj as në Vuno as në Lalëz, nuk kam ndërmend madje të pleqëroj por do të punoj deri në ditën e fundit të jetës.” tha Kokëdhima duke konfirmuar se Edi Ramën nuk e ka takuar këtë verë.

Marrëdhënia shoqërore mes Edi Ramës dhe Koço Kokëdhimës mori fund kur Gjykata Kushtetuese vendosi t’i heqë mandatin deputetit të Vlorës. Sidoqoftë gjatë intervistës Kokëdhima u duk i sigurte se do të rikandidonte sërish për deputet në zgjedhjet e ardhshme parlamentare.  Lapsi.al