KQZ ndan fondin për partitë politike – Mori mbi 10 mijë vota, përfiton edhe LIBRA

Politikë E Premte, 23 Korrik 2021 07:29

Komisioni Qendror i Zgjedhjeve (KQZ) do të mblidhet të hënën për të shpërndarë fondin prej 186 milion lekësh që buxheti i shtetit ka vënë në dispozicion të partive politike parlamentare të dala pas zgjedhjeve të 18 qershorit të vitit të kaluar. Sipas ligjit “Për partitë politike”, 70% e fondit, e parashikuar si mbështetje financiare për partitë, shpërndahet sipas numrit të deputetëve të fituar në zgjedhjet e fundit parlamentare. Çdo parti parlamentare përfiton ndihmë financiare në përputhje me numrin e deputetëve që ka fituar; 20 % e fondit ndahet në mënyrë të barabartë, ndërmjet partive parlamentare, ndërsa 10 %, sipas përqindjes së fituar ndërmjet partive politike që kanë marrë pjesë në zgjedhjet e fundit parlamentare dhe kanë fituar mbi 1 % të votave në shkallë vendi. Në raportin e KQZ-së për mbledhjen e radhës bie në sy fakti se pjesën më të madhe të këtij fondi e merr Partia Socialiste si fituese e vetme e zgjedhjeve, e cila merr konkretisht, 85.065.992 lekë të reja. Ndërsa, PD merr 51.808.975 lekëtë të reja, LSI-ja merr 26.160.224 lekë të reja. Po ashtu përfituese është edhe Partia për Drejtësi Integrim dhe Unitet. Ndërkohë, përfituese nga ky fond I KQZ-së është edhe Partia Socialdemokrate e Skënder Gjinushit, e cila përfaqësohet në Kuvend nga deputeti Tom Doshi. Po ashtu, përfituese është edhe forca politike që u krijua nga ish-lideri i saj Ben Blushi, e cila pavarësisht se arriti të ketë ndonjë deputet në Kuvend për shkak se ajo mori mbi 10 mijë voat në zgjedhjet e 2017-ës do të përfitojë një fond prej 6.570.833 lekësh të reja.

Raporti i plotë i KQZ-së

Në zbatim të Nenit 15/2, pika 2, gërma e të Ligjit nr. 8580, datë 17.02.2000 “Për partitë politike”, i ndryshuar, Komisioni Qendror i Zgjedhjeve përcakton masën e fondit publik që përfiton çdo parti politike në formën e ndihmës financiare vjetore, Ligji nr.109/2017, “Per buxhetin e vitit 2018”, ka parashikuar fondin prej 190 milionë lekësh si mbështetje financiare për partitë politike për vitin 2018. Neni 19, pika 2, e Ligjit “Për partitë politike”, i ndryshuar, percakton rregullat sipas së cilave bëhet shpërndarja e fondeve vjetore për partitë politike: 70 për qind, sipas numrit të deputetëve të fituar në zgjedhjet e fundit parlamentare. Çdo parti parlamentare përfiton ndihmë financiare në përputhje me numrin e deputetëve që ka fituar në bazë të sistemit zgjedhor të parashikuar në Kodin Zgjedhor; 20 për qind, në mënyrë të barabartë, ndërmjet partive parlamentare dhe partive politike që kanë përfituar mbi 10 mijë vota në zgjedhjet e fundit parlamentare; 10 për qind, sipas përqindjes së fituar ndërmjet partive politike që kanë marrë pjesë në zgjedhjet e fundit parlamentare dhe kanë fituar mbi 1 për qind të votave në shkallë vendi. Pjesa që mbetet pa u shpërndarë nga 10-përqindëshi i shtohet fondit prej 70 për qind dhe u ndahet partive parlamentare. Shuma totale që përfiton secila parti politike si mbështetje financiare për vitin 2018, është shumatorja e të gjitha shumave që rezulton nga llogaritjet e mësipërme duke zbritur sanksionet administrative me gjobë, vendosur nga KQZ, në zbatim të Ligjit nr. 8580, datë 17.02.2000 “Për partitë politike”, i ndryshuar, përkatësisht: për Partinë Socialiste 1 milionë lekë Vendimi i KQZ-së nr.576, datë 12.12.2017, për Partinë Demokratike 1 milionë lekë Vendimi i KQZ-së nr.578, datë 12.12.2017, për Partinë Lëvizja Socialiste për Integrim 1 milionë lekë Vendimi i KQZ-së nr.577, datë 12.12.2017, Partia Socialdemokrate 1 milionë lekë Vendimi i KQZ-së nr.579, datë 12.12.2017. Për këto arsye KQZ vendos të shpërndajë fondin prej 186 milionë lekë, partive politike, për vitin 2018