Manjani: Jo plotfuqishmëri për marrëveshjen e detit, s’ka Gjykatë Kushtetuese

Takimi i djeshëm i kreut të qeverisë Edi Rama në Presidencë me Kreun e Shtetit, Ilir Meta, ka pasur si pikë kryesore Marrëveshjen me Greqinë. Para pak kohësh, Presidenti i Shqipërisë, dha plotfuqishmërinë për vijim e negociatave të marrëveshjes. Por ndryshe mendon ish-ministri i Drejtësisë, Ylli Manjani i cili ka përçuar edhe një thirrje të fortë.

Me thirrjen për kujdesin për mos dhënien e Plotfuqishmërisë, Ylli Manjani thotë se nuk mund të këtë marrëveshje për sa kohë që në vend nuk ka Gjykatë Kushtetuese. ”Është kjo gjykatë që vlerëson kushtetutshmërinë e marrëveshjeve, por ajo nuk ekziston! Ndaj s’mund të ketë marrëveshje me askënd! Aq më tepër një marrëveshje për de-limitim kufinjsh”,-shkruan Manjani në facebook.

Më tej, Manjani thekson se Marrëveshja e Detit, nuk është vendim qeverie që prish e ndreq ndërtesa. ”Nëse duan të bëjnë ndonjë gjë të hajrit, të publikojnë rezultatin e negociatave dhe një hartë që del nga këto. Të ftojnë opinionin dhe specialistët të japin vlerësimet e tyre, deri sa vendi të ketë një Gjykatë Kushtetuese! Të “përfitojmë” nga kjo gjë absurde! Ndryshe, çdo gjë tjetër është Tradhëti ndaj vendit”,-shkruan më tej Manjani.

Shkrimi i plotë i ish-ministrit të Drejtësisë, Ylli Manjani

Plotfuqishmëri për marrëveshjen e detit?! Në mënyrë absolute jo! Kjo do ishte pjesë e tradhëtisë ndaj vendit. Republika e Shqipërisë për turpin e vet, nuk është në pozita kushtetuese të nënshkruajë marrëveshje ndër-shtetërore me askënd, sepse:

NUK KA GJYKATË KUSHTETUESE!

Është kjo gjykatë që vlerëson kushtetutshmërinë e marrëveshjeve, por ajo nuk ekziston! Ndaj s’mund të ketë marrëveshje me askënd! Aq më tepër një marrëveshje për de-limitim kufinjsh! Pu pu pu pu….

Me gjithë respektin, por: As qeveria, që ka treguar qartë që shet çdo gjë e gjithkënd, për pushtetin e Xhafallarëve e as Ramallarëve; As Presidenti, që ende nuk ka asnjë fjalë për keqqeverisjen; Nuk janë garanci për kushtetuetshmërinë e marrëveshjeve ndër-shtetërore!

Edhe sikur të dy këto institucione të ishin 100% qelibar, prap nuk janë garanci në kuptimin Kushtetues! Kjo garanci sipas Kushtetutes jepet vetëm nga Gjykata Kushtetuese!Si në çdo vend tjetër të botës. Kujtoj që edhe në shtetin e ri të Kosovës, ishte Gjykata Kushtetuese që i dha garancinë përfundimtare marrëveshjes me Malin e Zi!

Republika e Shqipërisë nuk e jep dot këtë garanci kushtetuese qytetarëve të saj! Kulmi! Marrëveshja e detit nuk është as kontratë koncensioni e as vendim qeverie që prish e ndreq ndërtesa publike, apo që pezullon çertifikatat e pronësisë!!!

Nëse duan të bëjnë ndonjë gjë të hajrit, të publikojnë rezultatin e negociatave dhe një hartë që del nga këto. Të ftojnë opinionin dhe specialistët të japin vlerësimet e tyre, deri sa vendi të ketë një Gjykatë Kushtetuese! Të “përfitojmë” nga kjo gjë absurde! Ndryshe, çdo gjë tjetër është Tradhëti ndaj vendit!