Ministria e Mbrojtjes-Berishës: Meçollari s’ka qenë spiun

Pasi dolën emrat e negociatorëve me palën greke, edhe pse jo zyrtarisht, duke iu referuar këtyre emrave, ish-kryeministri Berisha tha se në grupin e negociatorëve është një spiun, që i shërben një vendi tjetër.

Pas këtij qëndrimi, nuk vonoi as reagimi i Ministrisë së Mbrojtjes në përgjigje të akuzave se Artur Meçollari ka çertifikatë sigurie. Në deklaratën e Ministrisë thuhet se akuzat e bëra ndaj tij janë trillim.

“Akuzat për spiunazh për Artur Meçollarin janë një trillim. Ka pasur edhe ka çertifikatën e sigurisë e cila jepet dhe konfirmohet nga NATO. Kjo çertifikatë nuk i është hequr asnjëherë. Meçollari deri në vitin 2017 ka qenë këshilltar i komandantit të forcave të NATO, John Nicholson.”

Në një prononcim për median Berisha e quajti superskandal emërimin ne grupin negociator të Artur Meçollarit.

”Do të denoncoj me ashpërësinë më të madhe në grup një ish-spiun i larguar nga Forcat e Armatosura për lidhje agjenturore me shërbimet e huaja. Ai u largua pas dokumentimeve të pakundërshtueshme të SHIU dhe të dhënave të tjera i larguar me vendim të Prokurorisë së Përgjithshme. Eshtë Artur Meçollari. Ky përbën superskandal. Jam i sigurtë që e gjithë marrëveshja është bazuar në hartat e këtij spiuni që nuk ka interesa kombetare por vetem interesa te vendit qe i shërben. Ai ka zgjedhur rrugën e xhepit apo rrugën e influencës së vendit ku ai merrte rrogën tjetër për tu rikthyer në funksione nevralgjike të shtetit shqiptar”.