PD reagon ashpër ndaj Finos: Je vegla e Edi dhe Olsi Ramës për pastrimin e parave

Pas akuzave të deputetit të PS Bashkim Fino për ndërhyrje të PD-së në zgjedhjet për kreun e Federatës Shqiptare të Futbollit ka ardhur dhe reagimi i PD.

Në një deklaratë për mediat, PD thekson se nga ana e opozitës nuk ka asnjë ndërhyje në procesin e zgjedhjes së Presidentit të FSHF.

Në deklaratën e PD akuzohet kryeministri Edi Rama dhe vëllai i tij, Olsi Rama si persona që po mbështesin deputetin Bashkim Fino për tu zgjedhur në krye të FSHF. “Bashkim Fino nuk shqetësohet për këtë, sepse ka pranuar të jetë vegla e Edi Ramës, që përveç Prokurorisë, gjykatave, policisë, krimi të kapë edhe Federatën e Futbollit. Ai është pjesë e një farse politike, që ka për qëllim të kthejë Federatën Shqiptare të Futbollit në lavatriçe të pastrimit të parave të pista të Edi dhe Olsi Ramës, si dhe kriminelëve më të cilët mbajnë pushtetin”,- thuhet në deklaratën e plotë të PD.

Deklarata e plotë e Partisë Demokratike:

“Partia Demokratike përgënjeshtron si të pavërtetë deklaratën e kandidatit të PS për kreun e Federatës Shqiptare të Futbollit, Bashkim Fino. Është shpifje ajo çfarë Bashkim Fino e tregon si shqetësim, se kreu i opozitës ka ndërhyrë në Gjykatën e Tiranës për të ndikuar në mënyrë të paligjshme procesin e zgjedhjeve në Federatë. Në vend të kësaj shpifjeje, Bashkim Fino duhet të shqetësohej se gjykatat janë nën presionin e vazhdueshëm të bosit të tij, Edi Rama dhe po lirojnë nga burgu dhe nga fajësia kriminelët, më të cilët Rama ndan pushtetin, Lul Berishën, Emiljano Shullazin, trafikantët e kokainës së “Xibrakës”, Armando Prengën, Mark Frrokun.

Bashkim Fino nuk shqetësohet për këtë, sepse ka pranuar të jetë vegla e Edi Ramës, që përveç Prokurorisë, gjykatave, policisë, krimi të kapë edhe Federatën e Futbollit. Ai është pjesë e një farse politike, që ka për qëllim të kthejë Federatën Shqiptare të Futbollit në lavatriçe të pastrimit të parave të pista të Edi dhe Olsi Ramës, si dhe kriminelëve më të cilët mbajnë pushtetin. Lulzim Basha dhe Partia Demokratike nuk ka asnjë mjet për të ndikuar përveç sheshit! Më 27 Janar Lulzim Basha do të jetë në shesh së bashku me mijëra demokratë e socialistë të ndershëm! Për këtë shqetësohu Bashkim!”.

Më herët Bashkim Fino reagoi për çështjen e shoqatave fantazmë që do të votojnë në zgjedhjet për Presidentin e FSHF-së. Deputeti Bashkim Fino, thotë se PD po i bën presion Gjykatës së Tiranës që të regjistrojë sa më shpejt këto shoqata. Ja cfarë shkruan ai në faqen e tij në Facebook.

“Jam i shqetësuar nga informacionet që më vijnë së fundmi, që nga Partia Demokratike dhe kreu i saj ka pasur presion te Gjykata e Rrethit Gjyqësor Tiranë, për të ndikuar te gjyqtarët mbi regjistrimin sa më të shpejtë të Shoqatave të futbollit, të cilat kanë votuar dhe janë anëtarësuar në mënyrë ilegale në Federatën Shqiptare të Futbollit. I kërkoj publikisht si Partive Politike, ashtu edhe organeve gjyqësore, që të jenë sa më të pavarur dhe të qëndrojnë larg përfshirjes në abuzimet ilegale të Federatës Shqiptare të Futbollit”,- tha Bashkim Fino.