Presidenti Meta: Besoj se Ajazi do e realizojë me sukses detyrën në NATO

Dekretimi i ish-kreut të SHISH, Visho Ajazi si ambasador i Shqipërisë në NATO do të bëhet nga Presidenti, Ilir Meta pasi kandidatura e tij të paraqitet në Komisionin e Jashtëm të Parlamentit.

Burime nga Presidenca thanë për “Koha Jonë” se kreu i shtetit do të respektoj procedurën ligjore për emërimin e diplomatëve, të cilët para dekretimit raportojnë në komisionin e Kuvendit për objektivat që kanë në detyrën e re.

Gjithashtu, burime nga Presidenca bëjnë me dije se “Presidenti Meta beson se z.Ajazi do ta realizoje me shume sukses detyrën e tij në NATO”.

Ndërkohë mësohet se ish-kreu i SHISH është dekoruar nga Presidenca për shërbime në fushën e sigurisë dhe për kontributin në luftën kundër drogës. Dekorimi i Ajazit do të bëhet me rastin e 105 vjetorit të krijimit të armës se shërbimit sekret shqiptar, me 17 dhjetor.