Shkrimtari Kim Mehmeti: Rama e shndërroi qeverinë në një hale, vetë mbeti kazanxhiu

Shkrimtari dhe publicisti Kim Mehmeti i sheh të gjithë fajtorë për bërjen e Shqipërisë të pabanueshme për rininë.

Kim Mehmeti: Kemi nisur dekadën e tretë ku jetojmë vetëm me gënjeshtra dhe premtime të kota. Shpesh shqiptaria në përgjithësi dhe Shqipëria të ngjajnë si një “lopë” që për brirësh e mbajnë opinionistë të ndryshëm, mendimtarë të ndryshëm që gjithashtu janë mëkatarë për këtë që ndodhi që sa më lehtë politikanët ta mjelin.Erdhi koha kur nuk mundet më. Këtë mund ta bënin vetëm studentët. Boshti kurrizor i një populli është rinia studentore.

I ftuar në Ora News, Mehmeti argumentoi qëndrimin e tij se pse nuk mbështet dialogun e Ramës me studentët.

Kim Mehmeti: Kryeministri i Shqipërisë prej 5 vitesh flet për kazanin mediatik. Në fund ai nuk e vërejti që qeverinë e tij e shndërroi në një hale dhe vetë mbeti ai kazanxhiu që lëshon apo ndal ujin me të cilin lan jashtëqitjet kriminale, jashtëqitje të të gjitha kategorive. Në një situatë të tillë më duket pak absurde të bisedosh me një njeri të tillë. Ai e sheh pozitën e kryeministrit të tillë që të bësh garë dhe me popullin tënd. Nuk mund të dialogosh për atë që të takon.Ai është i zgjedhuri i popullit jo e kundërta.

Agim Baçi duke komentuar takimin e Ramës me studentët në Vlorë tha se sot ra miti se protesta është politike.

Agim Baçi: Sot rrëzuan mitin e idesë se ka diçka politike.Kryeministri u përball me një komunikim që e ka praktikuar vetë më parë. Studentët sot praktikuan një model që e ka vënë ndoshta në sikletin më të madh që kur ka ardhur në krye të qeverisë shqiptare. Modeli që Rama deshi të bëjë duke shkuar në Fakultet të ndryshme është i gabuar, është një protestë e vetme.Ideja për ta copëtuar është një përpjekje e vogël që do ta gënjejë dhe për pak kohë. Protesta ka një problem të madh për qeverinë. Sa kohë auditoret do të jenë të boshatisura dhe nuk ka negociim, protesta do të vazhdojë të jetë problematike.

Ndërsa kërcënimin e Ramës ndaj studentëve se do të humbasin vitin e sheh instiktiv.

Agim Baçi: Kryeministri mund të ketë shkuar tek kjo pikë instiktivisht, por unë mendoj që çdo kërcënim i studentëve është humbje.

Për Kim Mehmetin, qeveritarët e Shqipërisë  drejtojnë ende me mentalitetin e Enver Hoxhës.

Kim Mehmeti: Kjo protestë zbuloi se sunduesit e Shqipërisë sundojnë ende me mentalitetin e Enver Hoxhës. Kryeministri tërë kohën mbron ligjin duke thënë se i është dhënë autonomi Universitetit. Nëse është ashtu a guxon një Kryeministër të shkojë të grumbullojë rektorërt, dekanët dhe ti qortojë si fëmijë të vegjël dhe ata të ngratët të sillen si fëmijë. Unë nipërit nuk i qortoj dot ashtu si Rama rektorët e Universiteteve.A mundet që kryeministri të shkojë fakultet më fakultet dhe të mbajë mitingje me studentët. Kryeministri jeton në Shqipërinë e vet, është mendësi që nuk pranon asnjë mendje tjetër përpos të vetes.Ai eleminim e solli këtu, është i vetmuar. Në Shqipëri nuk përdortet më populli shqiptar, por populli opozitar dhe pozitar.

Baçi: Qeveritarët duhet të kuptojnë një gjë që janë zgjedhjet dhe duhet të jenë të përunjur përballë kërkesave që kanë qytetarët dhe sidomos rinisë që është e ardhmja. Duhet të marrë fund arroganca.Kryeministri është për ti shërbyer këtij vendi dhe është një shans shumë i madh.

Protesta e Tiranës frymëzoi dhe Tetovën dhe publisti Mehmeti thotë se është koha që kryeqyteti shqiptar të bëhet çadra e mbarë shqiptarëisë.

Kim Mehmeti: Do të doja që Shqipëria njëherë e përgjithmonë të bëhet çadra e shqiptarisë. Dua që më në fund që ne të funksionojmë mbarëshqiptarçe. Mjaft na copëtuan dhe partitë. Kemi ardhur deri aty sa hajduti i partisë sonë nuk na pengon sepse na jep diçka, por na pengon vetëm hajduti i partisë tjetër. Kështu u bëmë të gjithë hajdutë.Kjo protestë do të shkojë dhe më thellë.