PS: Basha sulmon biznesmenin që i dha kunatit të tij 220 milionë lekë

Partia Socialiste ka vijuar sot me reagimet ndaj kreut të Partisë Demokratike, Lulzim Basha, i cili dy ditë më parë publikoi listën e biznesmenëve që marrin kontrata të jashtëligjshme nga qeveria “Rama”.

Deputeti i Partisë Socialiste, Ervin Bushati komentoi vetëm për një nga emrat e listës së Lulzim Bashës, atë të biznesmenit Bashkim Ulaj. Bushati thotë se kompanitë e Ulajt i kanë dhënë firmës së kunatit të Lulzim Bashës 220 milionë lekë në një vit.

Pyetje që shtroi PD pas kësaj deklarate është: “Përse kur zoti Bashkim Ulaj paguan 220 milionë lekë për kunatin e Lulit ai është sipërmarrës i ndershëm; kurse kur kontraktohet nga shteti për të ndërtuar rrugë, duke hapur edhe vende pune, qenkërka i inkriminuar?”.

Deklaratë për media e deputetit të Partisë Socialiste, Ervin Bushati:

“Skema e gjobëvënies së Bashës

Prej kohësh brenda Partisë Demokratike thuhet haptas se: e gjithë opozita është vendosur në shërbim të familjes së Lulzim Bashës – konkretisht në shërbim të kunatit, Erjon Isufi. Strategjia që Lulzim Basha përdor është e qartë: “sulmo sipërmarrësit, për të derdhur pastaj para në arkën e kompanisë së kunatit”. Kur i nevojiten më shumë lekë, Luli i sulmon me emër, nga foltorja e PD-së në media.

Sot po ju sjellim një rast konkret. Kompania “Gener 2”, në pronësi të zotit Bashkim Ulaj, u akuzua disa ditë më parë nga Lulzim Basha si e inkriminuar, pasi pritet të ndërtojë rrugën e re “Tiranë-Thumanë- Vorë”.

Por e njëjta kompani, në pronësi të të njëjtit individ, vetëm brenda një viti ka paguar plot 220 milionë lekë tek kompania e kunatit të Lulzim Bashës. Ndoshta për kunatin edhe për Lulin, të cilët deri tani kanë arkëtuar plot 11 milionë euro nga “oligarkët”,  220 milionë lekët e “Gener 2” nuk mjaftojnë, e prandaj hedhin baltë mbi sipërmarrësit për të vendosur gjoba të reja?!

Por pyetja për të cilën duhet të përgjigjet sot Lulzim Basha është: Përse kur zoti Bashkim Ulaj paguan 220 milionë lekë për kunatin e Lulit ai është sipërmarrës i ndershëm; kurse kur kontraktohet nga shteti për të ndërtuar rrugë, duke hapur edhe vende pune, qenkërka i inkriminuar?

Rasti i sotëm është vetëm një.  Ditë pas dite do t’ju sjellim raste të tjera që vërtetojnë atë që në Partinë Demokratike thuhet hapur, që nga dita që Lulzim Basha na u bë Kryetar! Luli nuk e ka hallin as tek njerëzit, as te opozita, por te xhepi i tij dhe i kunatit të tij. Prandaj edhe kjo fushatë e fundit e Lulit nuk është asgjë më shumë, se sa gjobëvënia e rradhës ndaj biznesit shqiptar: Për të paguar më shumë para të kompania e kunatit!”.