Shorti për anëtarët e KED, debat mes maxhorancës dhe opozitës

Sot pritet të hidhet shorti për anëtarët e Këshillit të Emërimeve në Drejtësi. Ky vendim është kundërshtuar nga opozita, ku deputeti Eduard Halimi kërkon anulimin e procedurës.

”Ndryshimi i rregullave në mes të lojës është e papranueshme. Debati është që partia politike të mos ketë ndikim në zgjedhjen e KED. Sot PS apo nesër një parti tjetër të mos ketë ndikim që të zgjedhje kryeinspektorin që do kontrollojë sistemin gjyqësor. Propozimi jonë ishte dhe ngelet deri në krijimin e KLGj dhe KLP është e pamundur të zgjidhet një KED tjetër. Ne kërkojmë që kjo cështje të zgjidhet në këshillin e legjislacionit”,-tha deputeti i PD-së, Eduard Halimi.

Ndërkohë krejt ndryshe e sheh situatën deputeti socialist Ulsi Manja i cili tha se:“Për opozitën kanë pasur rëndësi emrat, për në ka pasur rëndësi zbatimi i Kushtetutës dhe procesit. Në asnjë nen të Kushtetutës nuk përcaktohet një afat kohor për zbatimin e dispozitave. Debati politik duhet t’ia lërë vendin debatit kushtetues. Nëse nuk duam të humbasim kohë në krijimin e KLP, KEGj etj, hajdeni të zbatojmë Kushtetutën dhe t’i japim frymëmarrje drejtësisë në këtë vend”.