Veliaj mesazh të rinjve: Partia Socialiste i jep shansin çdokujt

“Në Partinë Socialiste fillimi është i barabartë për të gjithë”. Ishte ky mesazhi që u dha kryetari i Bashkisë së Tiranës, Erion Veliaj të rinjve votues për herë të parë të Lagjes 13 në kryeqytet.

“Detyra jonë, nuk është që të kalojmë pragun e derës dhe të mbyllim derën, por të kalojmë pragun e derës dhe ta lëmë këmbën aty, që dera të mos mbyllet, për të hyrë dhe të tjerë, për t’ju dhënë edhe mundësi të tjerëve për të thënë: Unë nuk e di si del finish-i, por di që start-i është i barabartë për të gjithë”, u shpreh Veliaj, gjatë takimit me të rinjtë te biblioteka “Misto Treska”.

Ai tha se rinia e ka lidhur pasionin dhe idetë e veta me të majtën. Ndërsa, duke folur për rastin e kandidatit për deputet që është rritur në fshatin SOS, Alfred Muharremi, Veliaj tha se është shembulli tipik që në PS i jepet shansi çdokujt dhe nuk shihet prejardhja ose mbiemri.

“Unë jam krenar për ty, doja patjetër të ishe në listën tonë të Tiranës sepse besoj që të majtës i shkon që të promovojë njerëz nga çdo shtresë dhe nga çdo rrugëtim i jetës. E djathta, jo në Shqipëri, po kudo në botë, është tipikisht për elitën e shoqërisë, për aristokratët, ata që kanë pasur bizneset. Kurse e majta gjithmonë thotë: Duhet që çdo shtresë të ketë një shans. Dua që historia jote të jetë një histori që frymëzon, të rinj që nuk i kanë prindërit VIP-a apo të pasur, mbiemrin nuk e ka në mbiemrat aristokratikë të parisë së Tiranës, por që thotë: mund t’ja dal edhe unë”, theksoi Veliaj.