Pas akuzave nga kreu i PD-së Lulzim Basha, Presidenti i Shqipërisë Ilir Meta doli në një konferencë të jashtëzakonshme për shtyp, ku bëri me dije se do të nxjerrë të gjitha të vërtetat. Meta tha se Basha mashtron kur akuzon kreun e shtetit.
”Basha në daljet e tij publike, pas shpikjes së ”Trekëndëshit të Bermudës” është shprehur se ka ofruar gjithë mbështetjen e tij. Presidenti në respekt të kushtetutës kishte caktuar datën 30 qershor për mbajtjen e zgjedhjeve lokale. Sa më shumë afrohej kjo datë, aq më shumë përshkallëzohej situata me palëve politike. Palët politike provokonin njëra-tjetrin si burim të dhunës, ku kishte protesta, e ku u plagosën mjaft protestues”.
Presidenti Meta tregoi një bisedë që kishte me kreun e PD-së Lulzim Basha më 6 qershor, kur kreu i shtetit ishte në një vizitë zyrtare në Gjermani, në një kohë që situata në 2019 ishte e ndezur nga protestat e opozitës dhe në qershor ishin edhe zgjedhjet lokale.
Meta tha se Basha u ul në gjunjë dhe i kërkoi shtyrjen e zgjedhjeve të 30 Qershorit, dhe se Basha kishte shprehur frikën se në protestën finale të 8 qershorit që ishte planifikuar për rrëzimin e kryeministrin Edi Rama, ai nuk do të ishte në gjendje më që të kontrollonte popullin. Protesta e 8 qershorit u qetësua dhe u mbyll pa incidente, pasi Presidenti Meta anuloi zgjedhjet e 30 qershorit dhe më pas nxorri një tjetër datë për zgjedhjet lokale, më 13 tetor.
”Siç e dini Presidenti kishte caktuar datën 30 qershor. Sa më shumë afrohej data 30 qershor, aq më shumë përshkallëzohej konflikti mes partive. Dukej qartë se palët politike provokonin njëri-tjetrin. Kjo situatë u shoqërua me dhunë, patën të plagosur e të dëmtuar, mijëra qytetarë përjetuan gazin. Kjo e tensionoi klimën politike në vend. Në qershor, opozita mbajti protestën masive finale. Presidenti administroi se informacione se gjatë kësaj proteste do të përdorej dhunë arbitrare ndaj institucioneve. Presidenti ndodhej në Gjermani në këtë kohë, kohë gjatë të cilës erdhi edhe zoti Basha, i’u lut Presidentit të Republikës dhe në prezencë të të tjerëve. Iu përgjërua me lot në sy që Presidenti të anulonte protestën e 8 qershorit. Kjo pasi Basha nuk e mbante dot më nën kontroll popullin”.
Kreu i shtetit ndër të tjera tha edhe se Basha nuk denjoi të regjistrohej në KQZ për zgjedhjet e 13 tetorit, datë që e vendosi edhe vetë, pasi i kërkoi që të anulonte zgjedhjet e 30 Qershorit të 2019. Po ashtu tha se me veprimet e tij, Basha mbështeti kreun e Rilindjes me sulmet ndaj presidentit.
”Bojkoti i Bashës që e kishte kërkuar vetë ishte në sinkron të plotë me bojkotin e 4 anëtarëve të KQZ-së të caktuar nga PS-ja. Lulzim Basha nuk i shërbeu as vendit as opozitës, duke përjashtuar totalisht nga qeverisja vendore. Ai nuk e mbështeti pesidentin e Republikës në zbatimin e dekretit, por mungesa e kësaj, u përdor nga mazhoranca nga Komisioni hetimor dhe nga Venecia për të treguar se presidenti nuk donte të bënte zgjedhje. Basha mbështeti kreun e Rilindjes edhe për kapjen e pushtetit lokal. Me veprimet e tij mbështeti kreun e Rilindjes me sulme ndaj presidentit. Nuk e respektoi as Lulzim Basha dekretin për zgjedhjet e 13 tetorit. Me mosparaqitjen u vendos hapur kundër institucioneve të presidenti, me sulmin e tyre edhe për grabitjen e këtij institucioni”.
Pas qëndrimit të fortë dhe fakteve që nxorri Presidenti Ilir Meta në konferencën për shtyp ndaj Lulzim Bashës, ka ardhur edhe reagimi nga selia blu. Në një deklaratë të shkurtër, thuhet se demokratët e njohin mirë Metën sesi e përdori pushtetin në kurriz të tyre dhe asnjë përpjekje e ulët për përçarje nuk do t’i funksionojë.
”Përmes diversionit dhe mashtrimeve, mjetet e tij të zakonshme, Meta tenton të përçajë Partinë Demokratike. Demokratët e njohin mirë atë, ia dinë bëmat dhe gjëmat, se si e përdori pushtetin në kurriz të tyre dhe asnjë përpjekje e ulët për përçarje nuk do t’i funksionojë. Ne demokratët nuk i kemi asnjë borxh dhe nuk ia zgjidhim dot hallet e tija.
