Shkarkimi i Flamur Nokës nga Lulzim Basha si nënkryetar i Komisionit të Sigurisë dhe paralajmërimin e tij për përjashtim nga grupi i PD-së, ka ndezur më shumë situatën në selinë blu.
Ish-anëtari i Këshillit Kombëtar të Partisë Demokratike, Indrit Hoxha, thotë se kreu Basha bën shkarkime për shkak të frikës që e ka zënë pasi deputetët po shkojnë drejt ”Foltores” së Sali Berishës.
”Asnjë lloj vendimi që çdo natë merr Basha, nuk na habit më. Kjo që pas përjashtimit të Berishës. Shkarkimet e tjera Basha i bën për shkak të frikës që e ka zënë dhe është ngujuar në zyrë për gati rreth një muaj. Mund të jetë i vetmi kryetar opozite në botë që pasi ka humbur 4 herë zgjedhjet nuk del dot të takojë anëtarësinë e PD, por as qytetarët që ngrihen në protestë nuk e presin më. Basha ka humbur reputacionin. Vendimet e tij janë gjithmonë personale. Përpara Nokës është hequr edhe Bylykbashi”.
