Kandidati i koalicionit “Bashkë Fitojmë” për Bashkinë Shkodër Bardh Spahia deklaroi se në 14 Maj, gratë dhe vajzat si dhe çdo banor i Bashkisë Shkodër do t’ja japë me votë përgjigjen kësaj qeverie që në 10 vite me politikat e saj ka synuar gjunjëzimin e Shkodrës.
“Ka pasur zero financime të programeve apo të projekteve të ndryshme. Jo vetëm kaq po në vend që të kontribuonin në përmirësimin ekonomike, synuan të gjunjëzonin qendrën t’i ulnin peshën si kryeqendra e veriut. Në mënyrë që ta detyrojnë të nënshtrohet politikisht. Sot vijnë dhe flasin sikur të mos kishin qenë këta që gjatë 10 viteve e kanë konsideruar Shkodrën një armik dhe kundërshtar politik”,-shpreh Spahia.
Ai shprehu bindjen se në 14 maj, qytetarët e Shkodrës do dinë t’u japin përgjigjen e merituar. “Për 4 vjeçarin e ardhshëm kemi një program që ka vëmendjen tek çdo problematikë e qytetarëve. Askush më mirë se gratë nuk e din rëndësinë dhe nuk e provon çdo ditë vështirësitë ekonomike me të cilat haset shoqëria jonë”,-u shpreh Spahia.
Ai tha se gjatë 4 vjeçarit të ardhshëm programi i tij projekton Shkodrën me rritje ekonomike, zhvillim turizmi dhe investime.
