Al Khelaifi ironizon klubet e Superligës: S’merren me ata që tregojnë përralla dhe dështojnë!

Presidenti i ri i ECA-s, Nasser Al Khelaifi thirri Asamblenë e 26 të shoqatës Europiane të Klubeve të Futbollit. Numri një i Paris Saint Germain mori vendin e kreut të ECA-s pak muaj më parë, duke zëvendësuar Andrea Angellin, pas përfshirjes së këtij të fundit në nismën për krijimin e Superligës Europiane, një projekt që dështoi që në nisje.

“Nuk do të zgjatem duke folur për atë që “nuk ishte aq Super Ligë”, pasi nuk dua të merrem me ata që tregojnë përralla e dështojnë. Kush ka kërkuar të ndahet, ka dështuar. Ndjehem i nderuar që jam kryetar i ECA-s dhe jam këtu për të përfaqësuar interesat e çdo anëtari të vetëm e për të kontribuuar në përballimin e sfidave të futbollit sot”, deklaroi ndër të tjera Al Khelaifi.