Ançeloti: Juve më e fortë se në Kardif, Reali nuk kalohet vetëm me mbrojtje të fortë …

Trajneri i njohur italian, Karlo Ançeloti për momentin është i papunë pas largimi nga drejtimi i Bajernit. Strategu i njohur ka dhënë një intervistë për “Corriere dello Sport”, teksa ka komentuar dhe shortin e hedhur dje në Nion. Juventus do të përballet sërish me Realin, dhe për Ançelotin trajneri Alegri e di mjaft mirë se mbrojtja nuk mjafton për t’u kualifikuar.

“Në Uemblei, kundër Totenhemit, Alegri nënshkroi ndeshjen e përsosur, ishte një kryevepër e vërtetë e taktikave dhe e strategjisë. Juventusi mburret me mbrojtjen më të mirë të kampionatit, por qëndrueshmëria mbrojtëse për të eliminuar kampionët e Europës nuk do të ishte kurrë e mjaftueshme. Një gol, Real Madridi e shënon gjithmonë. Higuain dhe Dybala janë një dyshe e madhe. Asgjë nuk është e pamundur, mjafton të përmendim motivimin psikologjik. Kjo Juve është më e fortë se ajo e Kardifit, është shumë e vetëdijshme për forcën e vet…”, ka thënë strategu italian.

Lidhur me ndeshjen tjetër mes Barcelonës dhe Romës, Ançeloti mendon se ekipi spanjoll është dukshëm favorit.

Rreth çerekfinales tjetër, Barcelona-Roma, Ancelotti e pranon: “Historia e dy klubeve, puna e shkëlqyer në Ligën e Kampionëve dhe La Liga, klasi i lojtarëve të mëdhenj si Mesi, vetëm dy gola të pësuar deri më tani nga blaugranët në këtë edicion… Gjithçka thotë se kalon Barcelona. Por, Roma ende mund të shpresojë”.