Ancelotti karikon Napolin: Nuk firmos për barazim, jam këtu për të fituar gjithçka

Napoli do të shkojë në Torino, jo vetëm për të treguar forcën ndaj Juventusit, por dhe për të treguar se këtë sezon e kanë edhe më seriozisht për titullin kampion nën drejtimin e Carlo Ancelottit. Strategu italian në prag të ndeshjes është shprehur se nuk do të firmoste asnjëherë për një barazim në një duel të tillë.

“Problemi i vetëm për këtë ndeshje do të jetë formacioni, i vështirë për t’u përzgjedhur prej meje. Ekipi është mjaft mirë fizikisht dhe i motivuar. Më shumë se 11 lojtarë meritojnë të luajnë kundër Juventusit për atë që kanë treguar në ndeshjet e fundit.

Nëse do të nënshkruaja për një barazim në Torino? Kurrë nuk e kam bërë këtë në jetën time. Ec përpara në linjën time: nuk duhet të mendojmë për rezultatin. Mendojmë të luajmë mirë, duke përsëritur atë që kemi bërë në ndeshjet e fundit. Vështirësia rritet, është e pashmangshme, do të kemi më shumë presion, por nuk duhet të ndryshojmë mënyrën e të luajturit.

Çfarë do të thotë të kthehem në Torino? Është pjesë e së kaluarës, por nuk më shqetëson një gjë të tillë. Ishte periudhë e keqe për rezultatet, por më ndihmoi të rritesha dhe të kuptoja se si punohet në një klub serioz. Nuk e konsideroj atë eksperiencë negative.

Efekti Ronaldo? Për Cristianon kam mirënjohje të pafund. Përtej golave që shënonte, kur isha trajner në Madrid, më ka bërë përshtypje me cilësitë e tij njerëzore dhe profesionale. Jam i lumtur që është në Itali, mendoj se është një vlerë e shtuar për futbollin tonë”, deklaroi strategu italian.