Arsenali mund Fulham dhe shkëputet momentalisht +6 në krye nga City

Arsenali mori një fitore të thellë 3-0 ndaj Fulham, në ndeshjen e javës së 35-të të Premier League, të zhvilluar në Emirates Stadium. “Topçinjtë” e nisën ndeshjen me ritëm të lartë dhe kaluan në avantazh që në minutën e 9-të me Viktor Gyökeres, i cili finalizoi saktë një asist të Bukayo Saka.

Në minutën e 40-të, rolet u përmbysën, teksa Saka shënoi golin e dytë për vendasit pas një pasimi nga Gyökeres, duke dërguar topin në rrjetë me një goditje të ulët brenda zonës.

Vetëm pak para mbylljes së pjesës së parë, në minutën 45+4, Gyökeres kompletoi dopietën personale, duke realizuar me kokë pas një krosimi të Leandro Trossard.

Me këtë fitore, Arsenal forcon pozitat në krye të renditjes me 76 pikë, duke krijuar një diferencë të përkohshme prej 6 pikësh nga Manchester City, që ka zhvilluar dy ndeshje më pak. Nga ana tjetër, Fulham mbetet në kuotën e 48 pikëve, në vendin e dhjetë.