Atmosferë e ndezur në Izrael, “avullojnë” për 36 orë biletat për duelin ndaj Shqipërisë

Kombëtarja e Izraelit është larguar nga qyteti i Haifa-s për të shkuar në Beer Sheva, atje ku do të luajë nesër duelin ndaj kombëtares sonë në orën 20:45 në stadiumin “Toto Turner”. Në duelin me Skocinë u vu re një interesim i vakët i tifozëve, pasi në stadium ishin të pranishëm vetëm 10,234 spektatorë, por për duelin ndaj Shqipërisë atmosfera është krejtësisht ndryshe.

Në 36 orët e fundit janë shitur 5,000 bileta, ndërkohë që 2,000 kanë qenë të prenotuara, duke arritur në shifrën e 7,000 biletave të shituara deri më tani. 4,000 ftesa janë shpërndarë për të rinjtë nga perimetri i Gazës, ushtarët dhe organizatat e tjera jofitimprurëse, ndaj dhe pritet që stadiumi “Toto Turner” të jetë i gjithi i mbushur me 14,000 tifozë.

Në këtë mënyrë nesër në mbrëmje do të jetë një atmosferë e ndezur, pasi ky duel është shumë i rëndësishme për të dyja kombëtaret. /Koha Jone/