Beshiktash i fal një gol Skënderbeut, por i shkakton humbjen e dytë korçarëve

Skënderbeu ka pësuar humbjen e dytë radhazi në fazën përgatitore në Turqi. Pas disfatës së thellë 3-0 ndaj Bursasporit, ekipi korçar është mundur në shifrat 3-2 nga ekipi i njohur i Beshiktashit.

Ndeshja është shoqëruar nga një episod i rrallë në pjesën e parë, teksa shënojnë që në minutën e 15. Turqit gjetën golin me Pektemek në momentin që Bajram Jashanica ishte i dëmtuar dhe kishte nevojë për ndihmën e mjekëve. Ekipi turk rinisi lojën nga vija anësore, në një moment që korçarët po qëndronin palëvizur për t’i ardhur në ndihmë Jashanicës.

Skuadra e Beshiktashit zbatoi “Fair play”-in duke i dhënë mundësinë Ali Soue që të realizojë golin e barazimit. Pjesa e parë u mbyll në barazim, ndërkohë që në fillimin e të dytës është sërish Pektemek, i cili shënoi golin e avantazhit në minutën e 52. Më pas do të ishte radha e Alvaro Negredos, i cili thelloi avantazhin për ekipin e njohur turk. Në fundin e ndeshjes korçaret fitojnë një penallti që kthehet në gol nga Lilaj. /Koha Jonë/