Bruno Fernandes barazon Cristiano Ronaldon, është përfshirë në 140 gola te United

Mesfushori portugez Bruno Fernandes vazhdon të shkruajë historinë në Premier League, duke arritur një tjetër moment të rëndësishëm në karrierën e tij me Manchester United.

Gjatë ndeshjes së javës së 34-t ndaj Brentford, kapiteni 31-vjeçar dhuroi një asist vendimtar, duke e çuar në 19 numrin e pasimeve për gol në këtë sezon. Një shifër mbresëlënëse, që e vendos vetëm një hap larg rekordit absolut të asistimeve në një sezon të vetëm në kampionatin anglez.

Por arritja më e madhe vjen në totalin e kontributeve direkte në gola. Me këtë asist të fundit, Fernandes ka arritur në kuotën e 140 përfshirjeve në gola në Premier League, 70 gola dhe 70 asiste, duke barazuar kështu legjendën portugeze Cristiano Ronaldo gjatë periudhës së tij në “Old Trafford”.

Ndryshe nga Ronaldo, i cili e ndërtoi këtë shifër kryesisht mbi gola (103 gola dhe 37 asiste), Fernandes spikat për një balancë të përkryer mes finalizimit dhe krijimit të rasteve për shokët e skuadrës. Ai po konfirmohet gjithnjë e më shumë si zemra e lojës së “Djajve të Kuq”, në një sezon ku roli i tij është vendimtar.

Me këtë ritëm, Bruno Fernandes është pranë kapërcimit të ikonave të së kaluarës dhe vendosjes së emrit të tij në mënyrë të pashlyeshme në historinë e klubit dhe të futbollit anglez.