City, Arsenal dhe Tottenham fitojnë në Premier League (VIDEO)

Manchester City ka mundur 2-0 skuadrën e Brighton dhe ka marrë kreun e renditjes së Premier League. Sterling zhbllokoi ndeshjen në minutën e 29-të pas një asisti të Sane. Në pjesën e dytë ka ardhur edhe goli që ka mbyllur përfundimisht ndeshjen dhe që është realizuar nga Aguero në minutën e 65-të, me Sterling që ka qenë në rolin e shërbyesit.

Fiton edhe Arsenali i Unai Emery, që ka mundur 2-0 Watford-in në “Emirates”dhe ka marrë fitoren e pestë radhazi në kampionat. Nuk ka qenë një sukses i lehtë për t’u arritur nga “Topçinjtë”, të cilët kanë siguruar tri pikët në 9 minutat e fundit të ndeshjes falë autogolit të Cathcart (81′) dhe golit të Ozil(84′).

Tottenham mori fitoren e dytë radhazi në Premier League falë dygolëshit të realizuar nga Kane (25′, 34′ pen.) në fushën e Huddersfield, i mundur 2-0.