City shkatërron Evertonin dhe merr përkohësisht kreun në Premier League (VIDEO)

Manchester City ka rimarrë përkohësisht kreun e renditjes së Premier League pas fitores 3-1 ndaj Everton-it.  Ndeshja e zhvilluar në “Etihad Stadium” është zhbllokuar në minutën e 22-të nga braziliani Garbiel Jesus, i cili ka mposhtur portierin Pickford me një goditje të saktë brenda zonës së rreptësisë.

Në fillimin e pjesës së dytë braziliani shënoi edhe golin e dytë personal, sërish i shërbyer me mjeshtëri nga Sane. Miqtë rihapën ndeshjennë minutën e 65-të me një gol me kokë të Calvert-Lewin, i cili është ndihmuar edhe nga një devijim i lehtë i Fabian Delph.

Gjithsesi vendasit do të shënon sërish me Sterling, i cili shënoi në minutën e 69-të, 3 minuta pasi hyri në fushën e lojës në vend të Sane. Kampionët në fuqi të Anglisë kryesojnë me 44 pikë, dy më shumë se Liverpool-i i vendit të dytë, që nesër do të luajë kundër Manchester United.