Cristiano refuzon Portugalinë

Përkushtimi ndaj një tjetër fanelle dhe ndryshimi i kampionatit në një lëvizje të befasishme këtë verë, po i imponon Cristiano Ronaldos zgjidhje të vështira, si braktisja e përkohshme e përfaqësueses.

Kapiteni i kombëtares portugeze, ka vendosur të mos grumbullohet për miqësoren e programuar ndaj Kroacisë dhe më pas në debutimin e luzitanëve në Ligën e Kombeve kundër Italisë, ndeshje e cila do të luhet më 10 shtator në Lisbonë.

Ky është një lajm i mirë për Juventusin, por jo për tifozët e kombëtares kampione të Europës, që shpresonte se me “Topin e Artë” në fushë do të maksimalizonin mundësitë për 3 pikë të vyera në grupin e tyre në kompeticionin më të ri të UEFA-s.

Cristiano Ronaldo nuk do të mund të replikojë në vendin e tij të lindjes, duelet e stërvitjes me Chiellinin dhe Bonuccin, pasi vendimi personal për të mos luajtur në shtator me Portugalinë bëhet për t’u përqëndruar te Juventusi.