Muçi apo Cristiano Ronaldo? 18-vjeçari që po i çmend të gjithë (VIDEO)

Ka shënuar 8 gola në 18 ndeshje, mes tyre tre dopieta. Ernest Muçi, është ylli më i ri i futbollit shqiptar, i cili mbrëmjen e djeshme do të linte shenjë në derbin e fituar 5-1 kundër Partizanit.

I hedhur në fushë nga trajneri i Tiranës, Egbo, në pjesën e dytë, në vend të Michael Ngo, produkti i të rinjve bardheblu, ka gjetur golin e parë në minutën e 81-të dhe të dytin personal, që ka vulosur edhe shifrat në 5-1, me një realizim fantastik në goditje dënimi, të ngjashme shumë me ekzekutimet e Ronaldos.

Pjesë e kombëtares U-19, Muçi këtë sezon është bërë pjesë e ekipit të parë, duke u aktivizuar në 14 ndeshje në Superiore dhe 4 në Kupën e Shqipërisë. Ai është një nga produktet e akademisë së Tiranës, teksa një meritë të madhe për aktivizimin e tij nuk ka vetëm Egbo por dhe trajnerët e fundit që i besuan aktivizimin në ekipin e parë në një moshë të pazakontë për futbollin shqiptar.

Muçi ka një potencial të jashtëzakonshëm dhe interesimet në drejtim të tij kanë nisur që tani.