Cungu: Kartoni i kuq i Luftëtarit më shumë na prishi punë

Trajneri i Kukësit, Armando Cungu është shprehur i lumtur pas suksesit minimal ndaj Luftëtarit në Gjirokastër, por strategu i verilindorëve deklaroi se dalja e një prej kundërshatrëve me karton të kuq më shumë u prishi punë.

“Në radhë të parë komplimentoj djemtë për lojën dhe rezultatin, por edhe kundërshtarin pasi na e bëri shumë të vështirë. Më të lehtë e kishim kur ishim me forca të barabarta. Na mungoi qetësia e duhur për ta zgjidhur situatën me gol, por në pjesën e dytë na u bë me të vështirë pas kartonit të kuq të Luftëtarit, pasi ata bëhen më të vështirë për tu çarë. Fati që nuk kishim në pjesën e parë, na u shpërblye në fund.

Me ritëm më të shpejtë mund të çahej kundërshtarin ndërsa kur ekipi doli në inferioritet, mendohet se është më e lehtë për të marrë rezultatin, por realisht është më e vështirë. Kishim nervozizëm pasi donim fitore dhe po kalonin minutat. Nuk duheshin lëshuar pikët”, deklaroi Cungu pas ndeshjes.